ဆရာတော်လောင်းလျာသည် ၁၃-နှစ်အရွယ်တွင် ရှင်သာမဏေပြုသည်။ ဘွဲ့တော်မှာ ရှင်မုနိန္ဒဃောသ ဖြစ်သည်။ ငါးဆူဒါယကာ၏ သားတော် သတိုးဓမ္မရာဇာဘွဲ့ခံ မင်းကြီးနှောင်းပင့်၍ ပြည်မြို့သို့ရောက်သည်။ မင်းကြီးနှောင်း ကိုးကွယ်သော အရှင်ဘိသင်္ကေတသာရထံတွင် ဆည်းကပ်၍ စာပေပိဋကတ်သင်ကြားသည်။ ၉၅၅-ခုနှစ် အသက် ၁၅-နှစ်အရွယ်တွင် ဝေဿန္တရာပျို့ကို ဖွဲ့ဆိုစီရင်ရာ လောကဓမ္မနှင့် ပြည့်စုံလှသောကြောင့် သာမဏေကျော်ဟု ထင်ရှားလာသည်။ ထူးချွန်လှသဖြင့် ပဉ္ဇင်းကျော်ဟု ထင်ရှားပြန်သည်။
၉၇၀-ပြည်နှစ်တွင် အနောက်ဘက်လွန် မင်းတရားကြီးသည် ပြည်မြို့ကို လုပ်ကြံအောင်မြင်ပြီးသောအခါ ပဉ္ဇင်းကျော် အရှင်မုနိန္ဒဃောသကို အင်းဝမြို့သို့ ပင့်ဆောင်ကိုးကွယ်သည်။
အနောက်ဘက်လွန် မင်းတရားကြီးသည် ပြည်မြို့ကို အောင်မြင်စဉ် ငါ ပြည်ကိုလုပ်ကြံသည်ကား ရှင်တဆူ၊ လူတယောက်သာ ရသည်-ဟု မိန့်ဆိုခဲ့သည်။ ရှင်တဆူဟူသည် တောင်ဖီလာဆရာတော်လောင်း ပဉ္ဇင်းကျော် အရှင်မုနိန္ဒဃောသကို ဆိုလိုသည်။ လူတယောက်ဟူသည်မှာ ငထင်ငယ်ကို ဆိုလိုသည်။
၉၉၁-ခုနှစ်တွင် အင်းဝမြို့၌ သာလွန်မင်းတရားကြီး အထွဋ်အထိပ်သို့ရောက်သောအခါ ပဉ္ဇင်းကျော် အရှင်မုနိန္ဒဃောသကို မင်းဆရာတင်မြှောက်၍ တိပိဋကာလင်္ကာရ ဘွဲတံဆိပ်အပ်နှင်းသည်။
၉၉၆-ခုနှစ်တွင် အရှင်မုနိန္ဒဃောသသည် မင်းရဲကျော်စွာ ဆောက်လုပ်သော စစ်ကိုင်းတောင်အနီး ဧရာဝတီမြစ်နားရှိ လေးထပ်ကျောင်းတွင် သီတင်းသုံးသည်။ ထိုစဉ် အရှင်မြတ်သည် စက်တော်ရာသို့ ကြွတော်မူ၍ တော်ချုံဖုံးအုပ်နေသော စက်တော်ရာနှစ်ဆူကို ရှာဖွေရာ တွေ့ရှိတော်မူသည်။ ဤသည်မှစ၍ လူဒါယကာတို့သည် စက်တော်ရာဒေသသို့ လူသူအရောက်အပေါက် လွယ်ကူစေရန် ခုတ်ထွင်ရှင်းလင်းခဲ့ ကြသည်။
အရှင်မုနိန္ဒဃောသသည် စက်တော်ရာမှ အပြန်တွင် ပခန်းကြီးရွှေဥမင်ဆရာတော် အရှင်ဇမ္ဗုဓဇထံတွင် ၀င်ရောက်ဖူးတွေ့သည်။ ရွှေဥမင်ဆရာတော်သည် ခေါင်လှသောအရပ်ဒေသတွင် လူသူတော်တယောက်နှင့်သာ ခေါင်းပါးစွာနေတော်မူသည်။
ဤတွင် အရှင်မုနိန္ဒဃောသ-က လူသူနည်းပါး လှသည်။ ကြောက်တော်မမူပါလော-ဟု မေးတော်မူသည်။
ရွှေဥမင်ဆရာောတ်က ကြောက်၍ပင် ပရိသတ်အနည်းနှင့် နေပါသည်-ဟု မိန့်တော်မူသည်။
ထိုအခါ အရှင်မုနိန္ဒဃောသ-က ငါသည် မကြောက်တတ်သူ ဖြစ်ခဲ့ပြီ-ဟု တရားသံဝေဂ ရမိသည်။
ထို့နောက် အရှင်မုနိန္ဒဃောသသည် ရွှေဥမင်ဆရာတော်အား မေးမြန်းရာ ၀ိနည်းပါဠိတော် ငါးကျမ်းနိဿယကို စီရင်ပြီးကြောင်း သိရှိသွားသည်။ ကျမ်းပြုသက္ကရာဇ်ကိုကြည့်သောအခါ မိမိစီရင်ပြီးသား ကျမ်းပြုသက္ကရာဇ်ထက် ဦးသောကြောင့် မိမိစီရင်ထားသော ၀ိနည်းပါဠိ ငါးကျမ်းနိဿယကို ဌာပနာသွင်း၍ စေတီတည်သည်ဟု ဆိုသည်။
အချို့ကမူ အရှင်မုနိန္ဒဃောသသည် ရွှေဥမင်ဆရာတော်၏ နိဿယနှင့် မိမိစီရင်သော နိဿယကို ယှဉ်ကြည့်၍ နိဿယနှစ်စောင်ကြောင့် နှစ်နည်းရှိနေပြီ။ ဘုရားနှစ်ဆူ ပြိုင်၍ပွင့်သော် သူ့ဘုရားသာသည်။ ငါ့ဘုရားသာသည်ဟု အငြင်းအခုံဖြစ်ကြ၍ အကျိုးမရှိဖြစ်လေတော့မည်ဟု ဆင်ခြင်ကာ မိမိစီရင်အပ်သော နိဿယကို စေတီရင်ပြင်မှာ မီးပူဇော်သည်-ဟု ဆိုကြသည်။
အရှင်မုနိန္ဒဃောသသည် ရွှေဥမင်ဆရာတော်နှင့် တွေ့ဆုံပြီးနောက် အလွန်သံဝေဂရသဖြင့် မိမိသီတင်းသုံးရာ လေးထပ်ကျောင်းသို့ မပြန်တော့။ မင်းဝံတောင်ရိုး အရှေ့ချောက်ကြား၌ တောထွက်တော်မူသည်။ တောထွက်သည့်နေ့ရက်ကား ၁၀၀၀-ပြည့်နှစ် တပေါင်းလပြည့်နေ့ဖြစ်သည်။ သက်တော် ၆၀-ပြည်တွင် ဖြစ်သည်။
ဤအကြောင်းကိုကြားလျှင် သာလွန်မင်းတရားနှင့် ညီတော် စလင်းစား မင်းရဲကျော်စွာတို့သည် ဆရာတော်ကို သူ့ထက်ငါဦး ရှာကြသည်။ စလင်းစားသည် ဆရာတော်ကို အလျင်တွေ့သဖြင့် တောင်ဖီလာချောင်၌ ဇေတ၀န်ကျောင်းဆောက်၍ လှူသည်။ သာလွန်မင်းတရားကြီးကား မဟာတိပိဋကာလင်္ကာရဟူသော တံဆိပ်တော်ကို လှူတော်မူသည်။ ထိုအခါမှစ၍ တောင်ဖီလာဆရာတော်ဟု တွင်လေသည်။
သာလွန်မင်းတရားကြီးသည် မိမိ၏ဆရာတော်၊ တောင်ဖီလာဆရာတော်၏ သီလ၊ သမာဓိကို အထင်အရှားသိစေလိုသဖြင့် နန်းတွင်းသူမတဦးကို ဆရာတော်ကျောင်းသို့ ၀င်စေသည်။ ဆရာတော်အား ဖြားယောင်းစေသည်။
ဆရတော်သည် မာတုဂါမက တညလုံး ဖြားယောင်းပါသော်လည်း သိက္ခာပုဒ်ကို ထိန်းသိမ်းသည်။ တညလုံးမအိပ်မစက်၊ ရူပါရုံ၊ သဒ္ဒါရုံတို့၌ အာရုံမထားဘဲ ဓားမဖြင့် မိမိခြေသလုံးသားကို လှီးသည်။ ထိုမှဖြစ်လာသော ဒုက္ခဝေဒနာကိုသာ ခံစားလျက် တရားမလွတ်၊ မချွတ်မယွင်း တရားရှုမှတ်လျက် မိုးလင်းအောင် နေတော်မူသည်။
နံနက်သို့ရောက်သော် အချို့က ဆရာတော်ဘုရားသည် ခရီးသွားမိန်းမနှင့် ညက မှားယွင်းလေသည်ဟု ဆိုကြ၍ အင်းဝမြို့တမြို့လုံး၌ ကောလာဟလဖြစ်လေ၏။
ထိုအခါ ဆရာတော်သည် သူ၏ခြေသလုံးသားကို လှီးသော ဓားမကို သက်သေထူ၍ အဓိဋ္ဌာန်ဖြင့် ရေကန်တွင်မျှောလေရာ ထိုဓားမသည် ရေ၌ ကူးလေသည်ဟု ဆိုရိုးစကားရှိ၏။ ဤအကြောင်းကိုရည်၍ တောင်ဖီလာဆရာတော်ကို ဓားမကူးဆရာတော် ဟု ခေါ်ဝေါ်ကြသည်။
တောင်ဖီလာဆရတော်ကြီးသည် အဋ္ဌသာလိနီကျမ်းဦးအဖွင့် ၀ီသတိဝဏ္ဏနာကျမ်း၊ ယသ၀ဍ္ဎန၀တ္ထု၊ ၀ိနယာလင်္ကာရဋီကာ စသည်ဖြင့် ကျမ်းပေါင်းများစွာကို ပြုစုတော်မူခဲ့သည်။
ဆရာတော်ကြီး၏လက်ထက်တွင် အင်းဝနေပြည်တော်၌ ကျောက်ရောဂါကျရောက်ရာ ဆရာတော်ကြီးသည် ပြည်သူအများကို လျစ်လျူရှုတော်မမူ။ ကျောက်ရောဂါကာကွယ်ရေးကျမ်းကို
တောင်ဖီလာဆရာတော်ကြီးသည် ရှင်သာမဏေဘ၀တွင် သာမဏေကျော်၊ ရဟန်းဖြစ်စတွင် ပဉ္ဇင်းကျော်၊ မင်းဆရာဘ၀တွင် တိပိဋကာလင်္ကာရအကျော်၊ တောထွက်တော်မူလျှင် တောင်ဖီလာဆရတော်၊ သီလအရာတွင် စင်ကြယ်မြင့်မြတ်သဖြင့် ဓားမကူဆရာတော်ဟူ၍ ထင်ရှားကျော်ကြားခဲ့သည်။ ဆရာတော်ကြီးသည် ၁၀၁၂-ခုနှစ် သက်တော် ၇၂-နှစ်တွင် ပျံလွန်တော်မူသည်။
ယခုဖော်ပြသောဂါထာများမှာ တောင်ဖီလာဆရာတော်ဘုရားကြီး နေထွက်၊ မွန်းတည့်၊ နေ၀င် တနေ့သုံးကြိမ် အမြဲရွတ်ဖတ်တော်မူသော ဂါထာများဖြစ်သည်။ ဤဂါထာများကို ရွတ်ဖတ်ပူဇော်သူတိုင်း စိတ်အလိုပြီးစီး သောကြောင့် မနောမယိဒ္ဓိ ဂါထာများဟုခေါ်သည်။ စိတ်အလိုကြံစည်တိုင်း ပြီးစီးရုံသာမက ဘေးအန္တရာယ်လည်း အထူးကင်းရှင်းသည်။
(မနောမယိဒ္ဓိ ဂါထာတော်များ)
၁။ အနေကသတာ သမ္ဗုဒ္ဓါ၊ ဥပ္ပန္နာ ဘယနာသကာ။
မမံ သီသေ ပတိဋ္ဌန္တု၊ ရက္ခန္တု တေ မမံ သဒါ။
၂။ သုခါဝဟံ သတံဓမ္မာ၊ တိဋ္ဌန္တု ဟဒယေ မမံ။
အမှေဧတေ ပါလယန္တု၊ သုခံ ဒေန္တု မမံ သဒါ။
၃။ သမ္ဗုဒ္ဓါနံ အရဟန္တာ၊ တေဇ၀န္တော တတော တတော။
တေမေ အံသေ ပတိဋ္ဌန္တု၊ ပါလယန္တု မမံ သဒါ။
( မှန်ကန်တိကျစွာ အသံထွက်နည်း)
၁။ အနေကသတာ သမ်ဗုတ်ဓာ၊ အုပ်ပန်နာ ဘယနာသကာ။
မမံသီသေ ပတိတ်ထန်တု၊ ရက်ခန်တု တေ မမံ သဒါ။
၂။ သုခါဝဟံ သတံဓမ်မာ၊ တိတ်ထန်တု ဟဒယေ မမံ။
အန်မှေ ဧတေ ပါလယန်တု၊ သုခံ ဒင်တု မမံ သဒါ။
၃။ သမ်ဗုတ်ဓာနံ အရဟန်တာ၊ တေဇ၀န်တော တတော တတော။
တေမေ အံသေ ပတိထန်တု၊ ပါလယန်တု မမံ သဒါ။
(အနက်မြန်မာပြန်)
၁။ ရေတွက်မရ များပြားလှကုန်သော၊
ဘေးရန်အပေါင်းကို ဖျက်ဆီးတော်မူတတ်ကုန်သော ဘုရားရှင်တို့သည် ပွင့်တော်မူကြလေကုန်ပြီ။
ထိုဘုရားရှင်တို့သည် ကျွန်ုပ်၏ ဦးခေါင်းရတနာ မြတ်အင်္ဂါ၌ တည်နေတော်မူကြစေကုန်သတည်း။
ထိုဘုရားရှင်တို့သည် ကျွန်ုပ်ကို အခါခပ်သိမ်း အန္တရာယ်ဘေး ကင်းစင်ဝေးအောင် စောင့်ရှောက်တော်မူကြ
ပါစေကုန်သတည်း။
၂။ ချမ်းသာကိုဆောင်တတ်ကုန်သော ဘုရားအစရှိသော အရိယာသူတော်ကောင်းတို့၏ မဂ်ဖိုလ်နိဗ္ဗာန် ဓမ္မက္ခန်ဟု ဆယ်တန်သော တရားတော်မြတ်တို့သည် ကျွန်ုပ်၏ စိတ်နှလုံး၌ တည်နေတော်မူကြပါစေ
ကုန်သတည်း။
ထိုတရားတော်တို့သည် အကျွန်ုပ်တို့ကို ဘေးရန်ကင်းပျောက် ချမ်းသာရောက်အောင် စောင့်ရှောက်တော်မူကြပါစေကုန်
အကျွန်ုပ်အား အခါခပ်သိမ်း ချမ်းသာကို ပေးသနားတော်မူကြပါစေကုန်သတည်း။
၃။ ဘုရားရှင်တို့၏ ရွှေရင်တော်နှစ် သားတော်စစ်ဖြစ်ကြကုန်သော၊
ဘုန်းတန်ခိုးတေဇော် အာနုဘော် ရှိကြကုန်သော ရဟန္တာအရှင်မြတ်တို့သည် ထိုထိုအရပ်မျက်နှာတို့၌ ထင်ရှားရှိတော်မူကြကုန်၏။ ထိုရဟန္တာအရှင်မြတ်တို့သည် အကျွန်ုပ်၏ ၀ဲယာနှစ်ဖက် ပခုံးထက်၌ တည်နေတော်မူကြပါစေကုန်သတည်း။
အခါခပ်သိမ်း အကျွန်ုပ်ကို ဘေးရန်ကင်းပျောက် ချမ်းသာရောက်အောင် စောင့်ရှောက်တော်မူကြပါစေ ကုန်သတည်း။
မင်းယုဝေ
(မြတ်မင်္ဂလာ ၂၀၀၉-ခု မေလ)
No comments:
Post a Comment